Fransiya qon xizmati xolodilniklari buzib kirilib, harorat 110 darajagacha ko‘tarildi

Xakerlar Fransiya qon xizmatining (EFS) uchta obektidagi sovutish uskunalariga kiberhujum uyushtirdi va natijada kameralardagi harorat 110 daraja Selsiygacha ko‘tarilib ketdi. EFS matbuot xizmatining xabar qilishicha, hujum muzlatgich kameralarini masofadan boshqarish va monitoring qilish tizimlariga qaratilgan.

• Kiberhujum Fransiya qon xizmatining uchta obektidagi Coolworld kompaniyasi tomonidan yetkazib berilgan sovutish uskunalariga ta'sir qildi.
• Tajovuzkorlar odatda -30 C° da ishlaydigan kameralar haroratini 110 C° gacha o‘zgartirib yubordi.
• Buzib kirilgan kameralarda tibbiy muassasalar uchun qon preparatlari va EFS biobanklari namunalari saqlanayotgan edi.
• Monitoring tizimlari o‘z vaqtida ishlashi tufayli qon zahiralari saqlanib qoldi va bemorlar salomatligiga zarar yetmadi.

Hujum tafsilotlari va Coolworld uskunalari

Hujum qurboni bo‘lgan sovutish uskunalari Coolworld kompaniyasi tomonidan ta'minlangan bo‘lib, ular qon, uning komponentlari hamda biomateriallarni saqlash uchun -30 C° haroratni doimiy ushlab turishi kerak edi. Biroq ruxsatsiz kirish oqibatida harorat chegaralari va muzdan tushirish parametrlari o‘ta yuqori qiymatlarga o‘zgartirib yuborilgan, bu esa qimmatbaho namunalarni yo‘q qilib yuborishi mumkin edi.

EFS vaziyat to‘liq nazorat ostida ekanligini va xavfsizlik choralari o‘z vaqtida ko‘rilganini ma'lum qildi. Monitoring hamda ogohlantirish tizimlari anomaliyalarni tezda aniqlashga yordam berdi, buning natijasida qon komponentlari saqlanib qolindi. Qon yo‘qotilishi yoki bemorlar salomatligiga salbiy ta'sir ko‘rsatilgan holatlar aniqlanmadi.

Yevropadagi avvalgi xujumlar bilan bog‘liqligi

Mahalliy matbuot tarqatgan ma'lumotlarga ko‘ra, bu hujum oktyabr oyining o‘rtalarida Fransiya supermarketlarida sodir etilgan voqealarga o‘xshab ketadi. Oshkora zaifliklarga ega dasturiy ta'minotdan foydalangan xakerlar yuzlab do‘konlardagi xolodilniklar haroratini 50 C° gacha ko‘tarib, mahsulotlarni buzib tashlagan edi.

Noyabr oyida esa shunga o‘xshash kiberhujumlar Belgiya, Niderlandiya, Estoniya, Daniya, Lyuksemburg va Irlandiyadagi supermarketlar tarmog‘iga ham qilingan edi. EFS obektlarining nishonga olinishi tahdidning tijorat sektoridan tibbiyot va muhim infratuzilmalarga o‘tayotganini ko‘rsatadi.

Tergov va xavfsizlik choralari

Mazkur kiberensident yuzasidan Fransiyaning Milliy kiberxavfsizlik agentligi tergov ishlariga qo‘shildi. Mutaxassislar jinoyatchilar qanday qilib boshqaruv tizimlariga kirib olganini hamda pudratchi uskunalarning xavfsizlik darajasini tekshirmoqda.

Bu kabi hodisalar tibbiyot va muhofaza qilinadigan obyektlar uchun IoT qurilmalari hamda sanoat tarmoqlarini kiberhujumlardan himoya qilish naqadar muhimligini ko‘rsatadi. Jismoniy jarayonlarga masofadan turib aralashish xavfi mavjudligi tarmoq izolyatsiyasini va dasturiy ta'minotni yangilashni talab qiladi.