SpaceX Starlink Mobile xizmatini yirik aloqa operatoriga aylantirmoqchi
SpaceX past chastotali spektr litsenziyalarini qo'lga kiritib, Starlink Mobile xizmatini AQShdagi asosiy uyali aloqa operatoriga aylantirish rejasini e'lon qildi.
Dunyoga mashhur kosmik kompaniya SpaceX o'zining Starlink Mobile xizmatini yangi bosqichga olib chiqish niyatida ekanini ma'lum qildi. Kompaniya past chastotali spektr litsenziyalarini xarid qilgani bu boradagi muhim qadam bo'ldi va bu kelgusida yirik uyali aloqa operatoriga aylanish yo'lini ochadi.
Mazkur bitim AQSh Federal aloqa komissiyasining rasmiy tasdiqlashini kutmoqda. Ruxsat olingach, SpaceX o'zining sun'iy yo'ldosh orqali mobil aloqa tizimini yangi arxitektura asosida joriy etishni rejalashtirmoqda.
Yangi texnologiya kosmik sun'iy yo'ldoshlar tarmog'ini yer ustidagi infratuzilma bilan uyg'unlashtirib, foydalanuvchilarga qamrovi cheklangan hududlarda ham uzluksiz aloqa va internet taqdim etishni maqsad qilgan.
Bu qadam telekommunikatsiya bozorida raqobatni keskin kuchaytirishi kutilmoqda. Xususan, an'anaviy uyali aloqa operatorlari uchun jiddiy raqobat muhiti yaratilib, kelgusida butun dunyo bo'ylab sun'iy yo'ldoshli aloqa xizmatlarining rivojlanishiga turtki bo'lishi mumkin.
