Sun'iy intellekt turli tillardagi so'rovlarga 180 martagacha ko'p energiya sarflaydi

Michigan universiteti olimlari sun'iy intellekt turli tillardagi so'rovlarni qayta ishlashda sezilarli darajada farq qiluvchi energiya sarflashini ko'rsatib berdi. Til va modelga qarab, milliy tillardagi so'rovlarni qayta ishlash xarajatlari ingliz tilidagi ko'rsatkichlardan 1,4 dan 180 barobargacha oshishi mumkin.

• Tadqiqot 122 til hamda Qwen 3, Gemma 3 va Llama 3.1 modellarini qamrab oldi.
• Energiya sarfining farqiga asosiy sabab matnni tokenlarga bo'lish mexanizmidir.
• Ingliz tilida 17,6 kJ bo'lgan xarajat pushtu tilida 3147 kJ gacha yetdi.
• 5,2 milliardga yaqin odam qayta ishlanishi ingliznikidan kamida ikki barobar ko'p energiya talab qiladigan tillarda gaplashadi.

Energiya sarfi farqining sabablari

Asosiy sabablardan biri matnni eng kichik qismlarga — tokenlarga bo'luvchi tokenizatorlarning xususiyatlari hisoblanadi. Asosan lotin alifbosiga o'rgatilgan vositalar boshqa yozuv tizimlarini samarasiz qayta ishlab, so'zlarni ko'proq bo'laklarga ajratadi. Bu esa xotiraga bo'lgan talabni oshiradi va grafik protsessorlarning samaradorligini pasaytiradi.

Shuningdek, o'quv resurslari cheklangan tillar uchun modellar ingliz tilidagiga nisbatan 20–25 barobar uzunroq javoblar generatsiya qilishi mumkin. Bir chiqish tokeni uchun energiya sarfidagi maksimal farq 8,3 barobargacha yetgan, umumiy xarajatlar esa muayyan tillar uchun keskin farq qilgan.

Aniqchilikka ta'siri va biznes uchun oqibatlari

Tadqiqotchilar energiya sarfi va javoblar aniqligi o'rtasidagi bog'liqlikni ham aniqladilar. Ko'proq resurs talab qiluvchi tillar test topshiriqlarida yomonroq natija ko'rsatdi. Tijorat SI xizmatlari tokenlar soniga qarab haq olishini hisobga olsak, bu holat ba'zi til guruhlari uchun texnologiyadan foydalanish narxini oshirib yuborishi mumkin.

Muammoni hal qilish yo'llari

Mualliflar bu tafovutni kamaytirish uchun muayyan tillarga ixtisoslashtirilgan modellarni yaratishni, ma'lumotlar bazalarini kengaytirishni yoki universal tizimga yuborishdan oldin so'rovlarni ingliz tiliga tarjima qilishni taklif qilmoqdalar.