Kuryer cheksiz SIM-karta topib, 3000 dollar sarfladi va sudlandi

Jiangsu provinsiyasida korporativ cheksiz SIM-kartani o'zlashtirib olgan kuryerga nisbatan sud hukmi o'qildi. Chen familiyali shaxs topib olingan raqam orqali shaxsiy xaridlarni amalga oshirib, kompaniyaga 3000 dollardan ziyod zarar yetkazdi.

• Hodisa Changzhou iqtisodiy rivojlanish zonasida yuz berdi.
• Kuryer o'zgalar hisobidan 20 ming yuandan ortiq mablag' sarflagan.
• Kompaniya vaqtida blokirovka qilmagani sababli xarajatlar aniqlangach politsiyaga murojaat qilgan.
• Sud kuryerni 8 oyga shartli ravishda ozodlikdan mahrum etib, 40 000 yuan jarima belgiladi.

Topilgan SIM-karta va undan foydalanish boshlanishi

Kuryer Chenning shaxsiy raqami qarzdorlik sababli o'chirilib qolgan edi, shuning uchun topib olingan cheksiz balansli SIM-karta unga vaqtinchalik yechim bo'lib ko'ringan. U raqam yordamida musiqa va video xizmatlariga obuna bo'lib, internet orqali turli tovarlar xarid qila boshladi. Keyinchalik u ushbu raqamga ovqat yetkazib berish xizmatlari uchun yangi akkaunt ro'yxatdan o'tkazib, pullik xizmatlardan foydalanishni davom ettirdi.

Korporativ mas'uliyatsizlik va fosh etilish

SIM-karta Changzhou iqtisodiy rivojlanish zonasidagi kompaniyaga tegishli bo'lgan. Tashkilot operator bilan barcha xarajatlarni har oyda to'lash sxemasi asosida ishlagan, shuning uchun qo'ng'iroqlar, internet va xaridlar uchun mablag' korporativ hisobdan yechib olingan. Kompaniya kartani yo'qotganidan keyin operatorni o'z vaqtida xabardor qilmagan. Natijada Chen kartadan foydalanishni davom ettirib, sarflagan mablag'i 20 ming yuandan (3000 dollar) oshib ketgan va hisob-kitoblar tekshirilg uchbu holat fosh bo'lgan.

Tergov jarayoni va sud hukmi

Huquqni muhofaza qiluvchi organ xodimlari Alipay akkaunti ma'lumotlari yordamida erkakning shaxsini aniqlashdi. Chaqiruvdan so'ng Chen o'z ixtiyori bilan bo'limga kelib, qilmishini tan oldi. Tergov davomida prokuratura uning harakatlarini o'zganing mol-mulkini qasddan o'zlashtirish maqsadidagi o'g'irlik sifatida malakaladi. O'tkazilgan ochiq sud majlisi yakuniga ko'ra, sud Chenni o'g'irlik jinoyati uchun bir yillik sinov muddati bilan 8 oyga ozodlikdan mahrum etish va 40 000 yuan miqdorida jarima to'lash jazosiga hukm qildi.