Marvell Lumentum'ni $115 mlrd ga sotib olmoqda: tarixiy bitim tafsilotlari

AQShning Marvell Technology kompaniyasi Lumentum Holdings'ni qarz majburiyatlarini hisobga olgan holda 115 milliard dollarga sotib olish bo'yicha kelishuvga erishdi. Ushbu birlashuv texnologiya olami tarixidagi eng yirik moliyaviy bitimlardan birigaylanib, bozordagi oldingi rekordlarni ortda qoldirdi.

Kelishuvga ko'ra, aksiyadorlik kapitalining qiymati taxminan 80 milliard dollarga baholanmoqda va to'lov to'liq aksiyalar shaklida amalga oshiriladi. Lumentum egalari o'zlarining har bir aksiyasi evaziga Marvell'ning 4,5 ta oddiy aksiyasini olishadi.

• Bitim qiymati qarzlar bilan birga $115 mlrd, kapital qiymati esa $80 mlrd atrofida baholanmoqda.
• Hisob-kitob to'liq aksiyalar almashinuvi orqali amalga oshiriladi.
• Bitimni 2028 yilning birinchi yarmida yopish rejalashtirilgan.
• Nvidia har ikki kompaniyaning ham yirik sarmozadori hisoblanadi.

Sun'iy intellekt infratuzilmasi uchun yangi imkoniyatlar

Marvell ma'lumotlar markazlari uchun ixtisoslashgan mikrosxemalar ishlab chiqish bilan shug'ullansa, Lumentum optik komponentlar, laserlar va tarmoq uskunalarini ishlab chiqaradi. Kompaniyalarning birlashishi sun'iy intellekt infratuzilmasi bozorida yetakchi o'rinni egallashga imkon beradi.

Optik texnologiyalar hisoblash tizimlari o'rtasida katta hajdagi ma'lumotlarni uzatishda muhim ahamiyat kasb etadi. Ushbu integratsiya yordamida Marvell alohida chiplardan tortib butun ma'lumotlar markazlari yechimlarigacha bo'lgan to'liq ekotizimni taklif qila oladi.

Texnologiya bozoridagi rekord ko'rsatkichlar

Ushbu birlashuv texnologiya tarmog'i tarixidagi eng yirik bitimlar qatoridan joy oladi. Taqqoslash uchun, Microsoft 2022 yilda Activision Blizzard'ni 68,7 milliard dollarga, Dell esa 2016 yilda EMC'ni 67 milliard dollarga sotib olgan edi.

Marvell va Lumentum bitimining e'lon qilingan qiymati bu ikkala summadan ham sezilarli darajada yuqori. Bu sun'iy intellekt texnologiyalarining jadal rivojlanishi fonida infratuzilma xarajatlari naqadar oshib ketganini ko'rsatadi.

Nvidia ishtiroki va kelgusidagi rejalar

Kompaniyalarning umumiy yirik investorlaridan biri Nvidia hisoblanadi. 2026 yil mart oyida Nvidia ilg'or laser komponentlarini xarid qilish va ishlab chiqarish quvvatlarini kengaytirish uchun har ikki kompaniyaga 2 milliard dollardan sarmoya kiritgan edi.

Bitimni yakunlash 2028 yilning birinchi yarmiga mo'ljallangan bo'lib, buning uchun har ikki tomon aksiyadorlari va tartibga soluvchi organlarning rasmiy ruxsati talab qilinadi.