FBR 153 million haydovchilik guvohnomalari tarqalgani yuzasidan tergov boshladi
Darknetda 153 milliondan ortiq raqamli haydovchilik guvohnomalari sotuvga qo'yilishi ortidan FBR tergov ishlarini boshlab yubordi.
AQSh Federal qidiruv byurosi (FBR) shaxsni tasdiqlovchi raqamli hujjatlarning ommaviy ravishda sizdirilishi yuzasidan tergov harakatlarini boshladi. Gap 153 milliondan ortiq haydovchilik guvohnomalarining raqamli nusxalari qora tarmoqda (darknet) sotuvga qo'yilgani haqida bormoqda.
Xavfsizlikni buzish bilan bog'liq bu ulkan hodisa natijasida nafaqat haydovchilik guvohnomalari, balki tibbiy kartalar va yashash uchun ruxsatnomalar kabi qo'shimcha maxfiy hujjatlar ham xakerlar qo'liga tushgan. Jabrlanganlar asosan AQSh va Kanada fuqarolari ekanligi aniqlangan.
Dastlabki ma'lumotlarga ko'ra, mazkur ma'lumotlar bazasi shaxsni tasdiqlash xizmatlaridan biriga kiberhujum uyushtirish orqali qo'lga kiritilgan. Hozirda mutaxassislar ushbu sizib chiqish qanday sodir bo'lgani va hujjatlarning tarqalish ko'lamini aniqlash ustida ishlamoqda.
Mazkur holat raqamli xavfsizlik va shaxsiy ma'lumotlarni himoya qilish masalasi butun dunyo, jumladan, O'zbekiston va MDH davlatlari uchun ham qanchalik dolzarb ekanini ko'rsatadi. Zamonaviy raqamli xizmatlar va identifikatsiya tizimlarining ishonchliligi har qachongidan ham muhimroq ahamiyat kasb etmoqda.
